Hvernig endar þetta?

Nú stefnir allt í verkfall aftur. Það bendir ekkert til þess að miðlunartillagan verði samþykkt, enda ekki von eins og hún er. Mánaðarlaunin mín myndu t.d. hækka um rétt rúmlega 24 þúsund næstu 4 árin eða um kr. 6000 á ári að meðaltali, þá er eftir að borga skatt og svo er það verðbólgan. Varla mikil kaupmáttaraukning það... En hvað gerist ef hún verður felld? Skólastjórinn okkar segir að það verði búið að setja lög strax á fimmtudaginn. Það kemur væntanlega í ljós, en hann hefur oft reynst sannspár í gegnum tíðina.

Mig langar að setja hérna krækju inn á frétt um útskriftina í Kennaraháskólanum um daginn. Þetta var mjög virðuleg athöfn, 119 manns að útskrifast og merkileg ræða hjá rektor. Það eru líka myndir og hér er ein af mér þar sem ég er nýbúin að taka við skírteininu:

Þessi tvö ár hafa liðið ótrúlega hratt, námið var bæði skemmtilegt og mjög gagnlegt. Ég mæli með því við alla kennara að þeir drífi sig í framhaldsnám! Nú ætla ég að taka mér smáhlé til að melta og prófa allt það sem ég var að læra, en svo held ég áfram í masterinn. Það er alveg pottþétt.