Cornwall 19. - 24. apríl

Vika frá því við komum heim frá Cornwall og ferðasagan fyrst að koma núna. Mér til afsökunar hef ég að það hefur verið svo brjálað að gera hjá mér síðan við komum til baka, að mér finnst ég enn vera hálfþreytt eftir ferðina og hef bara ekki haft orku til að vera í tölvunni á kvöldin. En nú hlýt ég að vera að hressast því ég fór heilan blogghring áðan :) Ferðin, þ.e.a.s. til Cornwall, var mjög vel heppnuð; við fengum gott veður a.m.k. framan af, fórum um allt og skoðuðum marga skemmtilega staði. Hér kemur ferða-myndasagan:

Lynmouth í Norður-Devon, þar sem við gistum fyrstu nóttina. Góð tilbreyting frá flatlendinu í Cambridge, þó það hafi líka sinn sjarma.

Clovelly, ótrúlegur staður. Þessi gata er svo brött að bílar geta ekki keyrt þar um og fólk notar sleða til að flytja vörur niðureftir og rusl uppeftir.

Syðsti oddi Bretlands, Lizard Point. Gaman að koma þarna.

Þessa "eggjabúð" rákumst við á við eitt húsið í þorpinu Cadgwith. Alveg væri ég til í að eiga nokkrar hænur og setja upp svona búð...

Það gat orðið ansi heitt í sólinni og því gott að fara í fótabað í sjónum. Samt enn of snemmt til að synda...

Lands End, vestasti oddi Englands. Hér er allt frekar túristalegt og fannst okkur Lizard Point mun viðkunnanlegri staður.

Þetta er alveg magnaður staður hátt uppi í snarbröttum klettum fyrir ofan sjóinn og ströndina. Þarna er útileikhús eins og hálft hringleikjahús, höggvið utan í klettinn. Mjög sérstakt.

St. Michael's Mount. Út í þessa eyju er hægt að ganga þurrum fótum á fjöru en maður þarf að passa sig að fara til baka áður en það kemur flóð. Við fórum þarna út og lentum á tónleikum með verstu hljómsveit í heimi ;)

Þetta er í Eden Project, eins konar náttúrugarði með áherslu á umhverfismál. Hann er að hluta til undir tvískiptu kúluþaki, þar sem annars vegar er hitabeltisloftslag og hins vegar Miðjarðarhafsloftslag. Hér erum við undir appelsínutré Miðjarðarhafsmegin.

"Cornish cream tea" algjörlega ómissandi á hverjum degi.

Síðasta stoppið okkar var við Stonehenge. Alltaf jafnstórbrotið.

Eftir að við komum heim fór ég beint í það að safna gögnum fyrir rannsóknina mína í Comberton skólanum og um helgina fórum við síðan í tvær dagsferðir, aðra til Norwich og hina til London. Mamma og pabbi voru þá farin en við fórum með Nínu, Paul, Birni, Regínu, Jóhönnu og Jimmy. Fjögur þau síðasttöldu voru reyndar ekki með í Londonferðinni.

Það ætti að vera nokkuð ljóst að okkur leiðist ekki :)