Húsdýragarðurinn okkar

Það kom að því að ég náði myndum af kúnum hér í garðinum okkar. Ég hef nú kannski ekki mikið vit á slíkum búpeningi en þykist samt sjá að þær sem eru hérna núna eru bara kálfar, gætu verið ársgamlir og eru af báðum kynjum. Þegar ég var að hjóla heim úr skólanum í dag, taldi ég um 20 gripi í garðinum. En þessar myndir voru teknar í gær og á þeirri fyrri sést einmitt líka í göngubrúna þar sem ég steyptist á hausinn af hjólinu ofan í skurð "sællar" minningar sl. haust. Nú hjóla ég þarna yfir eins og ekkert sé. Sumar eru svo sólgnar í laufið af grátvíðinum að ein þeirra var næstum dottin í ána við að teygja sig eftir því. Þær eru nefnilega búnar með allt sem þær ná í nema það sem hangir yfir vatninu og það er dálítið erfitt að ná því.

Hægra megin á þessari mynd grillir í svanahreiður á eyju í ánni rétt við göngustíginn hér fyrir ofan. Þau kúra sig bæði niður en hreiðrið er nær vatninu. Konan á myndinni er síðan að horfa á annað hreiður þar sem svarta svanaparið hefur komið sér fyrir á fjórum eggjum (sjá neðri myndina). Heiðrin eru í ca. 150 metra fjarlægð frá húsinu okkar og við gætum næstum séð þau út um gluggann ef trén væru ekki fyrir. Endurnar eru svo yfir og allt um kring. Ég er eiginlega viss um að þær verpa líka í þessari eyju en aðeins lengra upp með ánni gengum við fram á einhvers konar sefhænu á uppbyggðu hreiðri út í miðri á. Aldeilis fjölbreytt dýralífið hér í "húsdýra"garðinum. Og ég er ekki byrjuð að segja frá skordýralífinu sem teygir sig alveg inn í íbúðina okkar...