Fuglarnir í garðinum okkar

Úti í Englandi fylgdumst við aðallega með öndum, gæsum og svönum í garðinum við húsið okkar þar. Hér á Seyðisfirði eru það rjúpur og þrestir sem skemmta okkur með nærveru sinni nú um stundir. Rjúpurnar hafa verið þaulsetnar við runna og tré víða í bænum undanfarið, enda sjálfsagt lítið orðið að hafa uppi í fjalli. Nokkrar þeirra hafa haft nokkuð stöðugt aðsetur við húsið okkar og náði Jóhann þessu myndbandi af þeim fjórum saman hérna um daginn.

Þrestirnir eru tiltölulega nýkomnir og það er greinilegt að þeim finnst kalt. Það snjóar og það snjóar en hitastigið er þó farið að mjakast upp á við. Þessi hér kúrði í lerkitré fyrir utan borðstofugluggann okkar í gær.

Í dag var glampandi sól og indælis veður alveg fram að kaffi. Það var Björnsmót á skíðum og þeir feðgar drifu sig upp í fjall upp úr kl. 10 í morgun. Ég tók því rólega fram að hádegi en fór svo í göngu upp á Bakka hér norðan megin í firðinum. Tók þessa vetrarlegu mynd á leiðinni.

En svo virðist sem auglýsing mín eftir vorinu ætli að bera árangur, alla vega hefur Mogginn gefið út að vorið komi á þriðjudaginn. Og ekki lýgur Mogginn...