Mánudagur - og páskafrí?!

Skilaði ritgerðinni á tilsettum tíma á föstudaginn og mikið var það góð tilfinning :) Ég hafði ekki verið sérlega ánægð með hana en leiðsögukennarinn minn sagði: "I'm sure it's better than you think" og ég ákvað bara að taka hana á orðinu og vona svo það besta. Einkunnin kemur varla fyrr en í maí og óþarfi að hafa áhyggjur af því strax. Nú er kennslu lokið á þessari önn og aðeins örfáir tímar áætlaðir á sumarönninni sem hefst seint í apríl. En það þýðir samt ekki að ég sé næstum því búin. Nei, ónei. Nú er lokaverkefnið eftir, sem er rannsókn og ritgerð upp á 20 þúsund orð takk fyrir, á meðan ritgerðir 1 og 2 hafa ekki verið "nema" 6000-6500 orð. Ég er búin að fá loforð frá Comberton Village College um að ég megi gera rannsóknina þar, en ég ætla að skoða hvernig þau hafa fellt tölvu-og upplýsingatækni inn í tungumálakennslu og hvaða áhrif það hefur haft á nám og kennslu. Fínt að geta bara einbeitt sér að þessu en ekki dugar annað en að byrja undirbúningsvinnuna annaðhvort núna eða strax!

Helgin var róleg enda hálfgert spennufall í gangi - fórum í göngutúr í bæinn á laugardag og í bíltúr út í sveit í gær. Nú er verið að spá smá kuldakasti hérna (hóta jafnvel snjókomu) en það er samt vor í lofti eins og sjá má á meðfylgjandi myndum sem voru teknar í gönguferðinni á laugardaginn. Athugið að það er hægt að smella á myndirnar til að stækka þær.

Páskaliljurnar við árbakkann í garðinum okkar. Stofuglugginn okkar er efst til hægri í blokkinni vinstra megin á myndinni.

Svarti svanurinn sem býr hérna á ánni. Hann er flottur en ósköp einmana greyið því hinir svanirnir (sem allir eru hvítir) vilja aldrei leyfa honum að vera með.

Við Stefán hjá kringlóttu kirkjunni í miðbænum. Ég held að hann hljóti að standa á tám á þessari mynd...

Það var heilmikið líf á ánni.

Sumir voru í grænu í tilefni St. Patrics Day...

Páskaliljur og aðrir vorlaukar í fullum skrúða.

Hér erum við Stefán fyrir framan hina vel þekktu King's College kapellu, ekki langt frá íbúðinni okkar.