Gestagangur

Undanfarið höfum við fengið marga góða gesti sem hafa viljað heimsækja okkur áður en við höldum af landi brott. Hefur það verið afar ánægjulegt og viljum við þakka öllum kærlega fyrir komuna, okkur þykir virkilega vænt um allar heimsóknirnar; Guðrún Lísbet, Ásdís og Inga, Ásta, Þórarinn Pálmi, Pálmi, Inga og Helgi, Auda og Níels, Elva og Hannes, mamma og Sandra (sem kemur á morgun). Gestirnir hafa sýnt okkur þá tillitssemi að stoppa ekki mjög lengi því við erum auðvitað á fullu að pakka niður og undirbúa flutninginn til Englands ;)

En heimsóknirnar hafa líka gefið okkur kærkomnar pásur og tækifæri til að skoða nokkra staði sem ekki er víst að við hefðum gert annars. Við fórum t.d. með Ástu og Pálma upp að Búðarárfossi og út í Skálanes með Elvu og Hannesi. Alveg dýrðlegt og ég get staðfest það að berjaspretta á Austurlandi er með allra besta móti í ár!

Ég fékk loksins í dag staðfesta skólavist í háskólanum í Cambridge og get þá farið að ganga frá ýmsum lausum endum sem gerðu kröfu um slíka staðfestingu. Ekki seinna vænna þar sem við siglum með Norrönu á fimmtudaginn kemur. Þetta verður líklega síðasta bloggfærslan áður en við förum en ég lofa að reyna að vera dugleg á meðan við erum úti. Að síðustu vil ég segja við þá sem halda að við komum ekki aftur: "Við komum alltaf aftur!" og er heimferðin tímasett eftir u.þ.b. eitt ár.