Að sökkva eða synda

Áramótin rétt nýliðin og strax kominn þorri. Svona getur þetta verið. Það kom mér dálítið í opna skjöldu hvað það var mikið að gera hjá mér í vinnunni núna í upphafi vorannar því ég átti von á að það yrði minni aðsókn í fjarnámið heldur en í haust. En það var nú aldeilis ekki, heldur þvert á móti - og ég komst líka að því að það var ýmislegt sem ég átti eftir ólært í sambandi við starfið mitt. En nú er mesta törnin búin og ég farin að ná sundtökunum finnst mér.

Ekki var ég fyrr komin úr kafi en Þorrablótið skall á. Og það ekkert smáblót! Um eða yfir 400 manns sprengdu utan af sér félagsheimilið Herðubreið og fór blótið því fram í íþróttahúsinu. Það hefur ekki gerst áður en var bara stórfínt; skemmtileg dagskrá í flottri þjóðlegri umgjörð, nóg pláss fyrir alla og miklu betri snyrtiaðstaða heldur en í Herðubreið. Það var meira að segja hægt að lenda á spjalli á klósettinu ;) Við fórum ekki heim fyrr en klukkan þrjú eða hálf fjögur sem ég hugsa að sé nálægt því að vera met hjá okkur sem erum annars venjulega komin heim fyrir klukkan tvö.

Datt svo í Harðskafa Arnaldar í gær og maður minn, hann kann svo sannarlega að halda athygli lesandans. Frábærlega grípandi bók.