Útskrift

Já, við drifum okkur út til Cambridge til að vera við útskriftarathöfn. (Takk kærlega fyrir allar hamingjuóskirnar og -kveðjurnar :) Mér fannst það alveg nauðsynlegt bæði til að ljúka náminu mínu formlega og eins til að setja punkt á eftir dvölinni þar. Útskriftarathöfnin er ein elsta hefðin sem enn er viðhaldið í Cambridgeháskóla; strangar reglur gilda um fatnað, allt fer fram á latínu og samkvæmt aldagömlum venjum. Það var mjög hátíðlegt og sérstakt að taka þátt í því. Síðan var auðvitað líka gaman að koma aftur til Cambridge og hitta Nínu og Paul, en við verðum örugglega mjög reglulegir gestir hjá þeim héðan í frá.

Við Chih-Jen (eða Daniel) frá Taiwan sem er með mér á myndinni, vorum bara tvö úr hópnum mínum sem útskrifuðumst núna en ég hitti líka Lijun kínversku vinkonu mína, þó hún kæmist ekki í athöfnina. Hún útskrifast í nóvember sennilega ásamt Shuo sem er líka frá Kína, en ég veit ekkert um kýpversku Mariu - þarf endilega að hafa uppi á henni.

Það er ekki víst að hér verði mikið bloggað á næstunni vegna anna. Samt er aldrei að vita ef eitthvað skemmtilegt gerist. Er t.d. að fara í dag á samæfingu á Requiem eftir Fauré sem verður flutt á Akureyri um næstu helgi og svo hér fyrir austan fyrstu helgina í nóvember. Sjáumst kannski þá!