Skírn, brúðkaup og Kárahnjúkar

Helgin var bæði viðburðarík og skemmtileg. Á laugardaginn var okkur boðið í skírn upp í Fellabæ til Helgu Daggar og Ása. Þegar athöfnin hófst í litlu, sætu sóknarkirkjunni þeirra, Áskirkju, kom í ljós að þau höfðu ákveðið að gifta sig í leiðinni! Mjög fáir vissu um þetta og kom það því flestum viðstöddum skemmtilega á óvart. Litli maðurinn fékk svo nafnið Höskuldur Már sem á einkar vel við hann. Á eftir var glæsileg veisla heima hjá þeim nýgiftu, þar sem boðið var upp á kampavín og dýrindis veitingar; grillað lambalæri og tertur í eftirrétt. Virkilega skemmtilegt og vel heppnað. Því miður gleymdum við myndavélinni heima, en Stefán tók þessa mynd á símann sinn.

Daginn eftir vorum við snemma á fótum því við ætluðum í ferðalag upp að Kárahnjúkum. Á leiðinni var komið við í sumarbústaðnum hjá tengdó þar sem við fengum dýrindis morgunkaffi. Svo keyrðum við sem leið lá upp á hálendið þar sem virkjunarframkvæmdir standa sem hæst. Þar er mikið um að vera, svo ég segi ekki meira. Að þessu sinni var myndavélin með í för en nú reyndist batteríið vera búið! Aftur kom Stefán til bjargar með símann sinn og tók hann myndina af okkur Jóhanni á útsýnisstaðnum fyrir ofan stíflurnar. Þaðan keyrðum við yfir brúna vestur yfir Jökulsá, fram hjá Kárahnjúkaþorpi og áfram niður að Brú í Jökuldal. Við vorum síðan komin heim vel tímanlega fyrir úrslitaleikinn í HM.

Að lokum má nefna að í gær ákváðum við að leigja Íslenskri orkuvirkjun efri hæðina í húsinu okkar í rúmt ár eða út september á næsta ári. Við erum ekki eins ákveðin í að selja húsið eins og við vorum en bíllinn okkar góði er enn til sölu. Hefur ekki einhver áhuga á Subaru í ótrúlega góðu ástandi miðað við aldur og fyrri störf? Aðeins 250 þúsund...