Með stúdentsveislu í farangrinum

Að útskrifast sem stúdent er merkur áfangi og honum ber að fagna. Undanfarið höfum við verið að skipuleggja útskriftarveislu einkadótturinnar um næstu helgi. Það er dálítið snúið þar sem við erum hér austur á fjörðum, en hún útskrifast frá Fjölbrautarskólanum í Ármúla. Að sjálfsögðu förum við suður í útskriftina og af ýmsum ástæðum ætlum við að fara keyrandi. Planið var að fara út að borða í Reykjavík og halda svo veisluna hér fyrir austan. En það tekur u.þ.b. 8-10 tíma að keyra hvora leið svo ekki gefst mikill tími til að halda veislu hvað þá að undirbúa hana. Hvað er þá til ráða?

Eftir miklar vangaveltur og heilabrot ákváðum við að hafa veisluna bara í farangrinum og koma svo við hjá öllum sem við ætluðum að bjóða! Við keyrum hvort sem er fram hjá og munar ekki um að stoppa stutta stund á hverjum stað. Þetta eru reyndar bara 2 staðir fyrir utan Seyðisfjörð; í Reykjadal hjá föðurfjölskyldu Söndru og í Mývatnssveit hjá fjölskyldunni minni. Þannig náum við að leyfa öllum ættum sem standa að dömunni að gleðjast með henni um útskriftarhelgina.

Og fyrir þá sem eru á suðvesturhorninu: við verðum stödd á veitingastaðnum Heitt og kalt á Grensásvegi 10, strax eftir útskrift um eða upp úr hádegi laugardaginn 21. maí, ef einhver sem þetta les hefur áhuga á að koma og óska nýstúdentinum til hamingju. Þar mun fást fínasta súpa og salatbar.

Um kvöldið ætlum við fjölskyldan svo að snæða hjá Austur Indíafélaginu á Hverfisgötu...mmm.

Með þessum pistli er tilvalið að láta fylgja mynd sem tekin var af Söndru Hrafnhildi þegar hún var svona þriggja ára með stúdentshúfu móður sinnar á höfðinu. Nú þarf að taka nýja mynd.