Þorláksmessa...

...á morgun og skötuveisla hjá tengdó annað kvöld, mmm. Það verður að viðurkennast að ég fann aðeins fyrir jólastressinu í síðustu viku, en er nú óðum að jafna mig, enda er þetta allt að hafast. Búið að senda allar jólagjafir og kort, búið að kaupa jólatré, jólaföt, jólamat og já, möndlugjöfina líka, búið að æfa jólasálmana og -svörin, búið að klippa Jóhann, búið að baka, gera laufabrauð og meira að segja konfekt:

Sandra kom heim þann 16. og hefur aldeilis munað um hana í jólabakstrinum og konfektgerðinni. Og svo fengum við sitt hvort kílóið af konfekti í jólagjöf frá bænum! Það verður líklega puðað í ræktinni eftir áramót og jafnvel á milli jóla og nýárs hugsa ég...

Á morgun verður þrifið og skreytt og svo mega jólin bara koma. Planið var síðan að fara norður á jóladag, en ef veðurspáin gengur eftir verður það líklega ekki hægt fyrr en á annan í jólum - svo framarlega sem það verður hreinsað þá.