Hvað!

Kominn 19. maí. Hmm, hef ekki staðið mig vel í blogginu undanfarið. Enda mikið verið um að vera það sem af er mánaðarins og lítill tími til að leika sér á netinu. Best að nota punktakerfið á þetta:

1.-19. maí 2008

• Byrjaði á því að leggjast í flensu. Það var ekki gaman. Missti þ.a.l. af námskeiði sem ég var skráð á fyrstu helgina í maí.
• Jóhann kom heim frá Spáni á sunnudeginum.
  
• Fundarherferð í samvinnu við ÞNA hófst strax eftir helgina. Nokkuð strembin en skemmtileg; fór fyrstu vikuna til Vopnafjarðar, Breiðdalsvíkur og Stöðvarfjarðar, auk fundar á Egilsstöðum.
  
• Á sama tíma voru prófin byrjuð í ME. Á minni könnu heilmikil umsýsla fjarprófa bæði okkar nemenda og annarra skóla.
• Stefán kláraði samræmdu prófin á fimmtudeginum. Eftir próf var sprell sem foreldrarnir höfðu skipulagt og undirbúið. Hugsa að þau kunni betur að meta það seinna þegar þau fara að rifja þetta upp... Óvissuferð var farin á föstudagskvöldið; snjósleðaferð, matur á Öldunni, leikhús og að lokum gist í bústað á Einarsstöðum. Tókst bara vel, held ég.
  
• Hvítasunnan. Kláraði (loksins!) að lesa yfir ritgerðina hennar Gullu. Allir ánægðir með það. Restin af helginni fór í að horfa á vídeó frá námskeiðinu sem ég missti af. Bæði fróðlegt og áhugavert. Er sem sagt enn með á námskeiðinu.
• Prófin héldu áfram svo og fundir, fór á Borgarfjörð eystri. Alveg magnað að koma þangað.
  
• 10. bekkur bauð foreldrum sínum í mat í skólanum sl. föstudagskvöld. Mjög flott og vel gert hjá þeim.
  
• Laugardagur 17. maí: 25 ára stúdentsafmæli. Hver hefði trúað því?! Skellti mér í bæinn og átti ótrúlega skemmtilegt kvöld. Kom reyndar ekki heim fyrr en undir morgun... Hitti marga, marga gamla vini og kunningja - bara næstum alla sem ég þekkti í MS - og fleiri til. Hitti m.a.s. Ásgeir og Þórhöllu í stúdentsafmælinu (!) sem var skrítið en skemmtilegt. Gisti hjá Söndru minni og náði aðeins að knúsa þau skötuhjúin og litlu penu kúluna. Takk allir fyrir samveruna og skemmtunina!!
  
• Í dag var fundur á Seyðisfirði, enginn mætti. Það var súrt en skrifast á reikning ófullnægjandi kynningar. Önnur tilraun verður gerð í næstu viku. Við fengum þó súpu á Öldunni.
• Síðustu menntaskólaprófin voru líka í dag.

Þetta er svona það helsta. Mánuðurinn byrjaði sem sagt ekki vel, en hefur farið stigbatnandi. Hápunkturinn er tvímælalaust stúdentsafmælið. Framundan eru aðeins rólegri tímar, held ég. Veit samt ekki alveg enn þá hvernig vorverkin eru í menntaskólanum. Reikna með að það verði aðallega undirbúningur fyrir næstu önn. Þarf líka að undirbúa mig fyrir seinni hluta námskeiðsins sem verður um mánaðamótin.

Myndin sem fylgir þessari færslu er í boði Vopnafjarðarhrepps og var tekin í fundarferðinni þangað. Tók því miður engar myndir í stúdentsafmælinu en treysti á að það birtist myndir úr samkvæminu einhvers staðar á vefnum. Endilega látið mig vita.