Fréttir af skrifum

Nú hef ég setið og skrifað lokaverkefnið frá því í maílok eða í um 7 vikur og seint í gærkveldi kláraði ég loks síðasta kaflann :) Þá var skjalið með efnisyfirliti, heimildaskrá og fylgiskjölum orðið 90 blaðsíður, alls tæplega 31 þúsund orð en ritgerðin sjálf um 19.500 orð. Það er fínt því ekki má fara yfir 20 þúsund. Í dag er ég svo búin að dunda mér við lagfæringar samkvæmt athugasemdum sem leiðsögukennarinn hafði sent mér um daginn og sendi henni svo skjalið aftur en hún átti eftir að lesa tvo síðustu kaflana. Þá á ég bara eftir að semja stuttan útdrátt, skrifa þakkir, bæta inn síðustu lagfæringum, prenta út, láta gormabinda og svo skila á mánudaginn! Þannig að nú er ég farin að sjá fyrir endann á þessu. Það er samt pínu sorglegt því þetta hefur verið svo skemmtileg vinna en auðvitað góð tilfinning líka því meistaragráðan er þá væntanlega í höfn. Nú er bara spurning hvenær hentar að fara í doktorinn...?

Set hérna með mynd af æðislegri Pavlovu tertu sem við fengum í eftirrétt hjá Nínu um síðustu helgi. Það var 'Big Weekend' á Parker's Piece og við fórum þangað eftir matinn að horfa á flugeldasýningu sem eru greinilega mjög vinsælar hér því við heyrum sprengingar næstum annað hvert kvöld en sjáum ekki mikið fyrir trjánum... Nema hvað, þessi sýning sem við sáum á föstudagskvöldið var nú ekki merkileg miðað við Guy Fawkes day í haust, en við erum enn að tala um þá glæsisýningu. Svo skruppum við aftur á Parker's Piece kvöldið eftir að sjá og heyra Balkan Beat Box, skemmtilega hljómsveit frá New York held ég. Annað hefur ekki verið gert síðan síðast fyrir utan þá skrifin auðvitað, en nú gæti orðið breyting á því. Erum t.d. að plana að fara í te í The Orchard í Grantchester um helgina - ef það verður sól ;)